3591 legalizime në tetor, ASHK: Dokumentet mund të shkarkohen online në e-Albania

Agjencia Shtetërore e Kadastrës ka dhënë 3591 vendime legalizimi për objektet informale në të gjithë vendin gjatë muajit tetor. Përmes një njoftimi zyrtar, ASHK bën të ditur se procesi vijon me publikimin e listave të përfituesve dhe vënien në dispozicion të dokumentacionit përkatës në format elektronik.

Qytetarët që kanë përfituar nga vendimet e legalizimit nuk kanë nevojë të paraqiten pranë sporteleve të Kadastrës për të tërhequr dokumentin. Ai mund të shkarkohet drejtpërdrejt nga profili personal në portalin qeveritar e-Albania.

Sipas Agjencisë, dokumenti elektronik është i pajisur me vulë digjitale dhe nënshkrim elektronik, duke pasur vlefshmërinë përkatëse ligjore.

Ndërkohë, qytetarët mund të verifikojnë nëse janë përfshirë në listën e përfituesve përmes listave emërore të publikuara në faqen zyrtare të ASHK-së, në rubrikën “Afishime”. Listat janë organizuar sipas drejtorive vendore, me qëllim lehtësimin e identifikimit të përfituesve. Kalimi i dokumentacionit në format elektronik synon të reduktojë paraqitjet fizike në sportele dhe të lehtësojë aksesin e qytetarëve në shërbimet kadastrale.