LIGJET E BIZNESIT
Modernizimi i bujqësisë shqiptare, rritja e produktivitetit dhe forcimi i konkurrueshmërisë së prodhimeve vendase ishin në fokus të takimit të Presidentit të Republikës, Bajram Begaj, me Michael Granoff dhe anëtarët e Bordit të Fondacionit Shqiptaro-Amerikan të Zhvillimit (AADF).
Gjatë takimit të zhvilluar në Pallatin e Brigadave, Presidenti Begaj vlerësoi projektin “TOKA”, i cili synon transformimin e sektorit bujqësor përmes rritjes së produktivitetit, forcimit të sigurisë ushqimore dhe përafrimit të praktikave bujqësore shqiptare me standardet e Bashkimit Evropian.
Sipas Presidentit, zhvillimi i bujqësisë mbetet i rëndësishëm për rritjen e ekonomisë vendase dhe krijimin e mundësive të reja për fermerët.
Një tjetër çështje e diskutuar ishte kontributi i AADF-së në zhvillimin ekonomik të vendit, përmes projekteve që synojnë përmirësimin e standardeve të punës dhe forcimin e kapaciteteve profesionale e institucionale.
Vëmendje iu kushtua edhe investimit në kapitalin njerëzor, përmes bursave, praktikave profesionale, bashkëpunimit akademik ndërkombëtar dhe programeve të aftësimit në Inteligjencën Artificiale. Këto iniciativa synojnë të zgjerojnë mundësitë e punësimit dhe zhvillimit profesional për të rinjtë, si dhe të forcojnë lidhjet me Diasporën.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Gjatë takimit u vlerësuan gjithashtu projektet e fondacionit në fushën e sigurisë kibernetike, ruajtjes së trashëgimisë kulturore, promovimit të turizmit dhe zhvillimit ekonomik lokal. Në këtë kuadër, u veçuan iniciativat në Butrint dhe në lagjen “Kala” të Elbasanit, të cilat ndërthurin mbrojtjen e trashëgimisë me potencialin për zhvillimin ekonomik të zonave.
Projektet e AADF-së në bujqësi, arsim, turizëm dhe aftësim profesional u evidentuan si pjesë e bashkëpunimit për të nxitur zhvillimin ekonomik dhe krijimin e mundësive të reja për Shqipërinë.
