LIGJET E BIZNESIT
Bizneset në Shqipëri mund të përballen me detyrime të reja për regjistrimin dhe përditësimin e të dhënave të aktivitetit ekonomik. Një projektligj për ndryshimin e ligjit për regjistrimin e biznesit dhe funksionimin e Qendrës Kombëtare të Biznesit (QKB) parashikon certifikimin e Kodit të Nomenklaturës së Veprimtarive Ekonomike (NVE), identifikimin e vendndodhjes së aktivitetit përmes GPS-it dhe sanksione për subjektet që nuk përmbushin kërkesat.
Sipas propozimeve, bizneset e reja do të duhet të ngarkojnë në portalin e-Albania certifikatën e Kodit NVE brenda 30 ditëve kalendarike nga regjistrimi në regjistrin tregtar. Në rast se dokumenti nuk dorëzohet brenda këtij afati, subjekti do të kalojë automatikisht në statusin “i pezulluar”, deri në plotësimin e detyrimit.
Edhe bizneset ekzistuese do të duhet të verifikojnë dhe të përditësojnë të dhënat për aktivitetin e tyre. Projektligji parashikon certifikimin dhe përditësimin periodik të Kodit NVE, ndërsa mosrespektimi i detyrimeve mund të ndëshkohet me gjobë prej 60 mijë lekësh. Përveç gjobës, subjektit mund t’i pezullohet e drejta për të kryer veprime në regjistrin tregtar, deri në saktësimin dhe certifikimin e kodit.
Një tjetër ndryshim lidhet me deklarimin e vendndodhjes së aktivitetit ekonomik. Subjektet do të duhet ta deklarojnë adresën gjatë regjistrimit fillestar dhe sa herë që ajo ndryshon. Për qëllime të verifikimit administrativ, identifikimi i vendndodhjes parashikohet të plotësohet me të dhëna gjeohapësinore përmes sistemit GPS, në përputhje me legjislacionin për mbrojtjen e të dhënave personale.
Certifikimi i Kodit NVE parashikohet të kryhet nga Dhoma Ekonomike Kombëtare, në bashkëpunim me QKB-në. Procedurat dhe mënyra e ndërveprimit mes dy institucioneve do të përcaktohen me akte të mëtejshme.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Projektligji synon standardizimin e të dhënave të bizneseve dhe përmirësimin e shkëmbimit elektronik të informacionit mes institucioneve. Megjithatë, këto janë propozime ligjore dhe detyrimet e reja do të varen nga miratimi dhe hyrja në fuqi e ndryshimeve përkatëse.
