LIGJET E BIZNESIT
Përtej banesave për qëllime banimi, lejet e ndërtimit tregojnë edhe se çfarë lloj aktiviteti ekonomik po zgjerohet në secilin qark. Hotele, zyra, ndërtesa tregtare apo industriale nuk shpërndahen njësoj në të gjithë vendin dhe pikërisht këto diferenca japin një panoramë interesante të zhvillimit rajonal.
Të dhënat e INSTAT tregojnë se, përtej banesave që dominojnë lejet në rang vendi, ndërtimet jorezidenciale ndryshojnë ndjeshëm nga një qark në tjetrin. Në nivel kombëtar, kategoria më e madhe është ajo e ndërtesave industriale, me 36.1% të lejeve jorezidenciale, e ndjekur nga “ndërtesat e tjera” me 24.3% dhe objektet tregtare me 22.1%.
Tirana dhe Durrësi spikasin për ndërtimet industriale. Tirana përqendron 31.1% të të gjitha lejeve industriale të vendit, ndërsa Durrësi plot 39.4%. Edhe në Berat, nga struktura e lejeve të qarkut, ndërtesat industriale dalin ndër kategoritë kryesore.
Një profil tjetër paraqesin Elbasani, Fieri, Korça dhe Lezha, ku një pjesë e rëndësishme e aktivitetit zhvendoset drejt kategorisë “ndërtesa të tjera”. Gjithashtu edhe Durrësi mban peshën më të madhe në kategorinë e “ndërtesave të tjera”, me 21.3% të totalit në vend.
Në Gjirokastër dhe Shkodër bie në sy pesha e ndërtesave tregtare. Shkodra përqendron 13.6% të lejeve tregtare në rang kombëtar, ndërsa Gjirokastra 6.2%. Tirana, megjithatë, mbetet qendra kryesore edhe e kësaj kategorie, me 30.9%.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Por panorama ndryshon krejt në Vlorë. Këtu ndërtimi jorezidencial lidhet fort me turizmin. Qarku merr 40% të të gjitha lejeve për hotele dhe struktura të ngjashme në vend. Durrësi përqendron 20%, ndërsa Tirana 18%.
Edhe Korça ka një profil interesant, me prani të hoteleve, objekteve tregtare, industriale dhe ndërtesave të tjera. Ndërsa Dibra dhe Kukësi kanë një volum shumë më të kufizuar lejesh jorezidenciale./Tv Scan
