Bashkim apo shkrirje: çfarë vlere kanë vendimet e këshillave bashkiakë? Tri skenarë

Kur propozohet shkrirja e një ose më shumë bashkive dhe bashkimi i territoreve të tyre me një bashki tjetër, të gjitha këshillat bashkiakë të prekur ftohen të shprehin qëndrimin e tyre.

Por çfarë ndodh kur vendimet e tyre janë të ndryshme? A mund të kompensojë vota pro e një këshilli votën kundër të një këshilli tjetër?

1. Disa bashki janë kundër, ndërsa bashkia pritëse është pro

Këshillat bashkiakë kanë të njëjtin status juridik. Asnjëri nuk është organ epror ndaj tjetrit dhe asnjëri nuk mund të vendosë për ekzistencën juridike të një bashkie tjetër.

Bashkia pritëse mund të shprehet pro zgjerimit të territorit të saj. Megjithatë, ky qëndrim:

-nuk e anulon kundërshtimin e bashkisë që humbet statusin,

-nuk përbën qëndrim pozitiv në emër të saj,

-nuk krijon dakordësi ndërmjet bashkive,

-nuk autorizon shkrirjen e bashkisë tjetër.

Vendimet nuk mund të numërohen sipas logjikës “dy me një”, sepse këshillat bashkiakë nuk formojnë një kolegj të përbashkët votimi. Secili këshill përfaqëson një bashki dhe një komunitet të veçantë.

Në këtë skenar ka qëndrime të ndryshme dhe nuk ekziston dakordësi e plotë për bashkimin.

2. Të gjitha bashkitë janë pro

Në këtë rast ekziston dakordësi institucionale:

-bashkia ose bashkitë që humbasin statusin pranojnë riorganizimin,

-bashkia pritëse pranon zgjerimin e territorit dhe marrjen e përgjegjësive të reja.

Kjo dakordësi nuk e realizon vetë bashkimin. Ndryshimi i kufijve dhe shkrirja e bashkive miratohen vetëm nga Kuvendi me ligj.

Megjithatë, qëndrimi pro i të gjitha këshillave i jep propozimit një bazë më të fortë institucionale dhe demokratike, nëse është marrë dhe vlerësuar edhe mendimi i popullsisë së çdo territori të prekur.

3. Të gjitha bashkitë janë kundër

Në këtë rast kemi kundërshtim të plotë institucional:

-bashkitë që humbasin statusin kundërshtojnë shkrirjen,

-bashkia pritëse kundërshton zgjerimin dhe marrjen e përgjegjësive shtesë.

Propozimi nuk mbështetet nga asnjëri prej këshillave bashkiakë. Nëse edhe popullsia e territoreve të prekura shprehet kundër, vijimi i tij do të kërkonte një arsyetim veçanërisht të fortë për interesin publik dhe mënyrën se si janë vlerësuar kundërshtimet.

Çfarë duhet të mbetet e qartë?

Vendimet e këshillave bashkiakë nuk e ndryshojnë vetë hartën territoriale. Kompetenca përfundimtare i takon Kuvendit, i cili vendos me ligj.

Megjithatë, këto vendime nuk janë formalitete. Ato shprehin qëndrimin institucional të secilës bashki dhe duhet të evidentohen, analizohen dhe vlerësohen veçmas, së bashku me mendimin e popullsisë së çdo territori të prekur.

Vota pro e një këshilli nuk mund të paraqitet si qëndrim pozitiv i një bashkie tjetër që është shprehur kundër.