Sa është kthimi nga investimi në pronat e bregdetit? Durrësi kryeson me 5.7% në vit, pasohet nga Golemi dhe Saranda

Blerja e një shtëpie në Shqipëri po shihet gjithnjë e më shumë jo vetëm si një investim për banim, por edhe si një mënyrë për të gjeneruar të ardhura të qëndrueshme nga qiraja.

Sipas studimit, tregjet bregdetare në Shqipëri po rezultojnë më të forta për sa i përket të ardhurave nga qiraja krahasuar me shumë zona të tjera të vendit. Në raport theksohet se apartamentet me dy dhoma gjumi në zonën e Plazhit të Durrësit dhe Golemit arrijnë një kthim neto rreth 5.7%, duke e bërë këtë një nga tregjet më tërheqëse për investitorët. Bazuar në këtë  vlerë rezulton se një apartment i tillë arrin ti kthejë investuesit vlerën totale pas 17.5 vitesh. Edhe Gjiri i Lalzit po shfaqet si një zonë premtuese për investime në prona, me kthim nga qiraja që arrin rreth 5.2%

Ndërkohë, në Vlorë, konkretisht në zonën e Lungomares, apartamentet me dy dhoma gjumi arrijnë një kthim neto rreth 4.3%, ndërsa në Sarandë norma neto e fitimit llogaritet rreth 4.4%. Këto shifra tregojnë se bregdeti shqiptar vazhdon të mbetet një nga segmentet më fitimprurëse të tregut imobiliar, veçanërisht gjatë sezonit turistik.

Megjithatë,  fitimi më i lartë vjen edhe me më shumë paqëndrueshmëri. Një apartament në Astir në Tiranë mund të ketë më pak fitim potencial, por konsiderohet më i qëndrueshëm për qira afatgjatë gjatë gjithë vitit. Nga ana tjetër, një apartament në Sarandë apo Golem mund të sjellë të ardhura shumë të larta gjatë verës, por kërkon menaxhim më të kujdesshëm dhe llogaritje konservatore për muajt e dimrit kur kërkesa bie.

Studimi i Investropa nënvizon se zona e Durrësit dhe Golemit ka një avantazh të veçantë pasi qiratë mbështeten jo vetëm nga turistët sezonalë, por edhe nga përdorimi në platformat e qirave afatshkurtra. Për apartamentet me dy dhoma gjumi në këtë zonë, kthimi bruto arrin rreth 7.7%, ndërsa fitimi neto mbetet në nivelin 5.7%, një raport që konsiderohet shumë konkurrues për tregun shqiptar.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Në Lungomaren e Vlorës, kthimi bruto për apartamentet e ngjashme llogaritet rreth 6.6%, ndërsa në qendër të Sarandës arrin rreth 6.8%. Sipas analizës, përfundimi praktik është se matematika e fitimit nga qiratë në bregdetin shqiptar mund të jetë shumë e fortë, por vetëm në rastet kur prona ndodhet në një zonë me kërkesë reale turistike dhe menaxhohet në mënyrë efikase./Tv Scan