LIGJET E BIZNESIT
Lufta në Lindjen e Mesme do të ngadalësojë ekonominë shqiptare. Paralajmërimi është bërë nga Banka Botërore. Nga 3.7 që ishte pritshmëria këtë vit për rritjen ekonomike, institucioni më i lartë monetar në botë vlerëson se zgjerimi i Prodhimit të Brendshëm bruto të vendit do të jetë vetëm 3.4 për qind.
“Ekonomia e Shqipërisë vijon të tregojë qëndrueshmëri, por rritja e këtij momenti kërkon reforma të guximshme strukturore. Rruga përpara është e qartë: përshpejtimi i reformave drejt anëtarësimit në BE, me më shumë investime në kapitalin njerëzor dhe infrastrukturën digjitale, si dhe mobilizimi i kapitalit privat do të nxisë investimet, krijojë vende pune dhe përshpejtojë konvergjencën me BE-në”, theksoi Massimiliano Paolucci, Menaxher i Zyrës së Bankës Botërore për Shqipërinë.
Për shkak të pasigurisë dhe frikës për një krizë çmimesh në aspektin energjetik, që më tej rrezikon të përcillet në të gjitha hallkat e zinxhirit të furnizimit, Banka Botërore ka ulur parashikimet për rritjen ekonomike për të gjitha vendet e Ballkanit Perëndimor.
“Rritja ekonomike e Shqipërisë parashikohet të ngadalësohet, sepse çmimet më të larta për energjinë dhe ndërprerjet e tregtisë të lidhura me situatën në Lindjen e Mesme po ndikojnë negativisht në fluksin e bizneseve. Ruajtja e trendit të rritjes ekonomike, në kushtet kur fuqia punëtore po tkurret, kërkon mobilizimin e kapitalit njerëzor të pashfrytëzuar, përmes reformimit të skemave të përfitimeve, lehtësimit të kufizimeve për kujdesin ndaj fëmijëve, forcimit të formimit profesional, dhe zgjerimit të punësimit për të rinjtë dhe gratë”, tha Angela Faith Montfaucon, ekonomiste e lartë në Bankën Botërore.
Shtetet e tjera më të pasura rrezikojnë t’i marrin Shqipërisë fuqinë punëtore… vendi duhet të identifikojë dhe zhvillojë avantazhet konkurruese, vlerëson Banka Botërore.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
