Rama jep lajmin për diasporën: Shumë shpejt linjë direkte Nju Jork-Tiranë

Një linjë direkte ajrore Nju Jorku-Tiranë. Është ky lajmi që ka dhënë kryeministri Edi Rama gjatë takimit me diasporën e Amerikës. Kreu i qeverisë u shpreh se kanë nisur diskutimet me kompaninë amerikane Delta për vendosjen e kësaj linje ajrore direkte me Tiranën.

“Shqipëria ka aeroportin me rritjen më të madhe në Evropë dhe aktualisht po negocion me kompaninë Delta për një fluturim direkt nga SHBA në Shqipëri. Nuk e di se kur përfundon negociata. Ndërkohë do të hapim dhe aeroportin e Vlorës I cili do të ketë pistën më të gjatë në rajon dhe është bërë e tillë për fluturimet transoqeanike dhe po bisedojmë me AirAlbania për një fluturim të drejtpërdrejt dhe do ta bëjmë këtu në Nju Jork. Por e sigurt është që koha e gjatë për të pasur një fluturim të drejtpërdrejt nuk do të jetë më aq e gjatë dhe besoj se për një kohë të arsyeshme do ta sjellim avionin këtu”, tha Rama.