LIGJET E BIZNESIT
Mbështetja e bizneseve shqiptare për përafrimin me standardet e Bashkimit Europian dhe lehtësimi i procedurave administrative ishin në fokus të mbledhjes së radhës së Këshillit të Investimeve, të drejtuar nga ministrja e Ekonomisë dhe Inovacionit, Delina Ibrahimaj. Gjatë takimit, ku morën pjesë përfaqësues të komunitetit të biznesit dhe partnerë ndërkombëtarë, u prezantua analiza e Sekretariatit të Këshillit të Investimeve dhe rekomandimet për adresimin e sfidave që sipërmarrjet shqiptare hasin në procesin e integrimit europian.
Ministrja Ibrahimaj theksoi se përafrimi me legjislacionin dhe standardet e BE-së nuk mjafton të mbetet vetëm në nivelin e miratimit të akteve ligjore, por kërkon edhe përgatitjen konkrete të ndërmarrjeve për të përmbushur kërkesat e reja në prodhim, shërbime dhe konkurrueshmëri. Në këtë kuadër, Ministria e Ekonomisë dhe Inovacionit, në bashkëpunim me partnerët ndërkombëtarë, ka nisur punën për një program të dedikuar për bizneset shqiptare. Ai do të zbatohet në disa faza, duke nisur me informimin mbi standardet horizontale, që zbatohen në të gjithë sektorët, dhe ato vertikale, që lidhen me industri të veçanta.
Një nga hapat kryesorë do të jetë vlerësimi i nivelit të përgatitjes së ndërmarrjeve përmes mbledhjes së informacionit drejtpërdrejt pranë bizneseve. Kjo do të shërbejë për të identifikuar nevojat konkrete për investime në teknologji, pajisje, ambiente dhe certifikime. Sipas Ibrahimajt, mbështetja për certifikimin dhe modernizimin e ndërmarrjeve është përfshirë edhe në programin “Dyfisho Sipërmarrjen Tënde”, ndërsa po shqyrtohen instrumente të tjera financiare, përfshirë mundësinë e krijimit të granteve të dedikuara.
Një tjetër çështje e diskutuar ishte reduktimi i burokracive dhe barrierave administrative që ndikojnë në aktivitetin e sipërmarrjeve. Ministrja bëri të ditur se gjatë muajit dhjetor do të rinisin tryezat e konsultimit me sektorë të ndryshëm të ekonomisë. Në këto tryeza do të shqyrtohen procedurat për pajisjen me leje, licenca, autorizime dhe shërbime të tjera publike, me synimin për të identifikuar kostot dhe pengesat që hasin bizneset. Ibrahimaj ftoi përfaqësuesit e sipërmarrjes dhe shoqatat e biznesit të bëhen pjesë aktive e këtij procesi.
Në mbledhje u trajtuan gjithashtu çështje që lidhen me forcimin e sistemit të klasifikimit, monitorimit dhe inspektimit, përmirësimin e standardeve në turizëm dhe garantimin e zbatimit të njëtrajtshëm të kërkesave ligjore për të gjitha ndërmarrjet. Në fokus ishte edhe projektligji i ri “Për investimet në Republikën e Shqipërisë”, i cili ndodhet aktualisht në konsultim publik. Nisma synon krijimin e një kuadri ligjor në përputhje me standardet europiane, duke përfshirë mekanizma për mbrojtjen e investimeve, shqyrtimin e investimeve të huaja direkte dhe masa mbështetëse për investitorët. Ministrja theksoi se konsultimi me biznesin dhe partnerët ndërkombëtarë do të vijojë, ndërsa aktet nënligjore do të përgatiten dhe diskutohen paralelisht me projektligjin, me qëllim garantimin e një kuadri të plotë dhe funksional për investimet në vend.
