Rama, akuza të rënda prokurorëve: Po mbrojnë dosje ulëritëse të evazionit fiskal

Pas bizneseve, kryeministri Rama ka gjetur një tjetër fajtor për nivelin e ulët të pensioneve. Në një takim me pensionistët në qytetin e Durrësit, ai ngriti akuza të rënda ndaj Prokurorisë së Tiranës, duke thënë se po mbulohen dosje ulëritëse të evazionit fiskal ndaj bizneseve.

Rama tha se sipërmarrësit e kanë Prokurorinë në xhep, e cila sipas tij, i mbron nga referimi që ka bërë administrata për evazion fiskal ndaj tyre.

“Keni dëgjuar ndonjëherë që një sipërmarrës të merret i pandehur për evazion? Mendoni ju se administrata nuk i ka identifikuar disa prej tyre? I ka identifikuar dhe ia ka referuar edhe Prokurorisë së Tiranës, por janë mbuluar me trupat e prokurorëve dosje ulëritëse të evazionit fiskal, të cilët e kanë Prokurorinë në xhep sepse unë nuk gjej asnjë shpjegim tjetër.

Ligji e ruan rendin, por nëse ligji nuk vepron për këtë kategori si për të gjithë të tjerët, ne kemi një problem të madh. Prandaj është jo e lehtë, por ne do të vazhdojmë të bëjmë punën tonë. Për këtë, ne do të bëjmë digjitalizimin e transaksioneve, si dhe një tjetër mekanizëm që po e vëmë në funksion me inteligjencën artificiale”, u shpreh Rama.

Gjithashtu, kryeministri siguroi pensionistët se rritja e rrogave të deputetëve dhe ministrave nuk ka asnjë ndikim në rritjen e pensioneve.

“Pavarësisht se disa deputetë e kanë bërë zhele figurën e deputetit, shumica e deputetëve nuk e meritojnë fare këtë lloj perceptimi dhe në fund të ditës pagat për Kuvendin e Shqipërisë, janë paga për Kuvendin e Shqipërisë, pavarësisht se ç’mund të themi për disa deputetë”, tha Rama gjatë një takimi me pensionistët në Durrës.

“Por edhe sikur ta pezullonim fare parlamentin e të merrnim të gjitha pagat e deputetëve, kjo do të kishte një ndikim 30 lekë, sikur ta pezullonim komplet qeverinë dhe deputetët. Dhe sigurisht që ky është muhabet kot, por ky është thelbi. Ndërkohë që nga ato paga përsëri merren sigurime shoqërore. Taksat janë të fëmijëve, sigurimet shoqërore janë të pensionistëve”.

Kryeministri u kujtoi pensionistëve ndryshimin mes tij dhe Sali Berishës. “Ka qenë njëri që ju jepte një gjysmagjel dhe ja u bënte për gjë të madhe. Ne e rritëm bonusin dhe e bëmë jo një gjel për dy pensionistë, por një bonus prej 50 eurosh për secilin nga pensionistët. Tani kjo nuk mjafton më, kjo është shumë e qartë. Do ta rrisim bonusin e fundvitit. Jemi duke parë një plan rritjeje të pensioneve gradual, duke shtuar pjesën tonë dhe duke filluar një tjetër operacion për të rritur të ardhurat”.