Investimet publike dhe kryesisht ato në infrastrukturë janë një ndër prioritetet e qeverisë për vitin e ardhshëm. Kjo jo vetëm se vijon financimi I projekteve të nisura, por edhe për faktin se 2025-ta është një vit elektoral. Në projektbuxhetin 2025 që ka nisur diskutimet në komisionet parlamentare konstatohet se buxheti për ndërtimin dhe sistemimin e rrugëve kap vlerën 18.53 miliardë lekë lekë, nga 15.37 miliardë lekë që ishte një vit më parë.
Në draft jepet edhe lista e shpenzimeve, nga ku konstatohet se vlera më e lartë e financimit do të shkojë për ndërtimin e Korridorit 8, me një total prej 8.8 miliardë lekë. Për këtë rrugë, janë 14 lote që aktualisht janë lidhur kontratat apo janë në fazë tenderimi.
Buxheti i vitit që vjen siguron financim edhe për zgjerimin e autostradës Tiranë – Durrës, në 2 lotet ku aktualisht kanë nisur punimet, ndërkohë që financimi për fazat III, IV dhe V, që janë përfshirë si zëra për herë të parë këtë vit, parashikohet të nisë në vitin 2027. Gjithashtu, buxheti i vitit që vjen parashikon financime për rikonstruksionin e rrugës Kombinat – Ndroq – Plepa, në lotin e parë të saj.
Gjithashtu, parashikohet financimi i Unazës së Madhe të Tiranës me 402 mln lekë, duke marrë në konsideratë se pjesa më e madhe e pagesave për kontratat e kësaj rruge janë kryer në vitet e mëparshëm.
Ndërkaq, për herë të parë këtë viti është përfshirë edhe financimi i ndërtimit të bypassit të Sarandës, me një fond prej 680 mln lekë të vënë në dispozicion. 2 projektte që bien në sy janë edhe ndërtimi i rrugës Kashar – Nyja Vaqarr, me 1.46 mld lekë dhe rehabilitimi i rrugës Fier -Kthesa e Patosit – Frataj, me 1.27 mld lekë.
Paralelisht, do të vijojë financimi për kontratat e partneritetit publik – privat, ku sipas draftit të dërguar në Kuvend janë 3 kontrata që do të mbështeten, me një vlerë totale prej rreth 5.4 mld lekë.
Ndërkaq, sa i takon investimeve rrugore me financim të huaj, janë rreth 3.4 mld lekë që do të shkojnë për transportin rrugor. Pjesa më e madhe e këtyre fondeve do të shkojë për ndërtimin e segmentit rrugor Qukës – Qafë Plloçë, me 2.4 mld lekë.
