Transporti publik në Europë – Qytetarët e Tiranës dhe Romës, më të pakënaqurit sipas studimit

Transporti publik ka një ndikim të madh në kënaqësinë e përgjithshme të banorëve me qytetin ku jetojnë, sipas raportit të Komisionit Evropian.

Anketa mbi cilësinë e jetës në vendet evropiane, e cila mblodhi përgjigje nga mbi 71,000 njerëz në 83 qytete në Evropë, zbuloi se në vitin 2023, afërsisht shtatë nga 10 banorë ishin përgjithësisht të kënaqur me transportin publik.

Megjithatë, ka një hendek të madh në nivelet e kënaqësisë së transportit publik midis tyre. Për sa u përket kryeqyteteve, banorët e Tiranës dhe të Romës janë më të pakënaqurit, duke regjistruar shifrën më të ulët (29%). Sipas studimit, kënaqësia në kryeqendra varion deri në 91 për qind në Vjenë.

Kjo pabarazi është edhe më e madhe midis qyteteve, me norma që variojnë nga 22 për qind në Palermo të Italisë në 95 për qind në Zyrih të Zvicrës.

Vihet re një tendencë gjeografike ku vendet e Evropës Veriore dhe Perëndimore raportuan kënaqësi më të lartë me transportin publik, ndërsa ato të Evropës Jugore dhe Lindore shfaqën nivele më të ulëta kënaqësie.

Për shembull, kënaqësia e transportit publik tejkaloi 85 për qind në tre kryeqytete nordike, si Helsinki, Oslo dhe Stokholm, e ndjekur nga afër nga Kopenhaga, me 81 për qind. Ndërsa më shumë se gjysma e banorëve në gjashtë kryeqendra jugore ishin të pakënaqur me shërbimet e transportit, duke përfshirë Tiranën, Romën, Podgoricën, Beogradin, Nikosian dhe Shkupin.

Anketa kërkoi nga banorët perceptimet e tyre nëse transporti publik është i përballueshëm, i sigurt, i lehtë për t’u aksesuar, i shpeshtë dhe i besueshëm.

Roma regjistroi rezultatet më të ulëta në katër nga treguesit kryesorë, si siguria, aksesueshmëria, frekuenca dhe besueshmëria. Gjithashtu, kryeqytetet e vendeve kandidate për në BE kishin rezultate të ulëta në këta tregues./Tv Scan