Anisa Ceno, nënkryetare e Unionit Turistik Shqiptar, dega Vlorë, thotë se këtë vit ka rënë numri i pushuesve nga Kosova që vizitojnë Vlorën gjatë sezonit veror.
“Kemi mungesë të pushuesve nga Kosova, 20% më pak në 15 ditët e para të korrikut dhe ndjejmë gjithashtu një faktor tjetër që ndikon në uljen e numrit të prenotimeve në hotele për shkak të shtimit të apartamenteve Airbnb”, thotë Ceno në një intervistë për A2 Business në A2 CNN.
Sipas saj, në mars kanë qenë 600 struktura në Booking, ndërsa në qershor kanë qenë 1200 njësi akomoduese. “Dhe nuk janë 600 hotele të rinj të hapur në këto muaj, por janë apartamente. Kjo ndikon në ulje të nivelit të çmimit mesatar”, thotë ajo.
E pyetur për rritjen e çmimeve, Ceno thotë se kjo ka ndodhur vetëm për shkak të kursit të këmbimit dhe rënies së vlerës së euros kundrejt lekut. “E gjithë kjo antireklama që bëhet çdo vit për jugun e Shqipërisë është katalizator i frymave të ndryshme të vendeve të tjera konkurruese në Mesdhe. Greqia, Mali i Zi, na shikojnë si konkurrentë. Kemi pasur mesatarisht 20% rritje të çmimeve në njësitë akomoduese. Pse ndodh kjo? Kryesisht për shkak të valutës. Nëse para dy vitesh hotelet, për të arkëtuar 120 mijë lekë duhet ta shisnin dhomën 100 euro, sot për të arkëtuar po të njëjtën velrë duhet ta shesin dhomën e hotelit, 120 euro”, thotë Ceno.
