Të shtëna në Kurbin/ Plagoset me a rmë zjarri një person (EMRI)

Të shtëna me armë zjarri në Kurbin.

Si pasojë është plagosur një person, teksa policia ka vënë në pranga autorin.

Mësohet se Met Lika ka qëlluar Rasim Tafën, pas një sherri banal mes tyre.

Sipas informacioneve, shkak i konfliktit është bërë një lopë, e cila kishte hyrë në tokën e autorit.

Pas debateve me fjalë, Met Lika ka shtënë me armë në drejtim të komshiut të tij, duke e lënë të plagosur.  Ambulanca mbërriti menjëherë në vendin e ngjarjes dhe i plagosuri është nisur për në spitalin e Traumës në kryeqytet.

Policia ndodhet në vendin e ngjarjes dhe po vijon hetimin për të zbardhur dinamikën e sherrit banal që degradoi në përdorimin e armës së zjarrit.

Njoftimi i policisë:

Kurbin / Plagosi me armë zjarri për motive të dobëta një 53-vjeçar, falë reagimit në kohë të Policisë kapet dhe vihet në pranga autori i dyshuar.

Në fshatin Gjormë, Kurbin, rreth orës 20:15,  shtetasi M. L., 41  vjeç, banues po në këtë fshat, dyshohet se gjatë një konflikti të çastit për motive të dobëta, me bashkëfshatarin e tij, shtetasin R. T. 53 vjeç, e ka plagosur me armë zjarri 53-vjeçarin, i cili është dërguar në spital, për ndihmë mjekësore.

Falë reagimit në kohë, veprimeve të shpejta dhe profesionale policore, është kapur dhe shoqëruar në ambientet e Komisariatit të Policisë Kurbin, për veprime të mëtejshme procedurale, autori i dyshuar i plagosjes, shtetasi M. L.

Grupi hetimor, nën drejtimin e Prokurorisë së Rrethit Gjyqësor Kurbin, ndodhet në vendin e ngjarjes dhe vijon veprimet hetimore për zbardhjen e plotë të rrethanave të ngjarjes dhe dokumentinin ligjor të saj.