LIGJET E BIZNESIT
Presidenti Ilir Meta tha në emisionin “Open” të gazetares Eni Vasili, në News24, se nuk e ka tradhtuar dhe nuk do ta tradhtojë kurrë lëvizjen e dhjetorit.
Ai deklaroi në studio se ka qenë pjesë e kësaj lëvizjeje, jo se ka qenë i persekutuar, por se ka qenë i bindur se ishte një regjim që duhej përmbysur.
Lidhur me këtë, Meta theksoi se ka krijuar bindjen e plotë se e vetmja mënyrë për të dalë nga kriza e thellë, ku ndodhet vendi aktualisht, është sërish përmbysja e regjimit, duke paralajmëruar kështu protesta, siç paralajmëroi sot edhe kreu i PD, Sali Berisha, nga Kuvendi.
“Mesazhi është dhënë shumë i qartë dhe i drejtpërdrejtë, i qëndroj edhe sot e kësaj dite, sepse jam President, kam qenë kryetar Kuvendi, kam qenë kryeministër, në opozitë, por kurrë nuk e kam tradhtuar dhe nuk e tradhtoj lëvizjen e dhjetorit për demokraci. Kam qenë në lëvizjen e dhjetorit, jo se kam qenë i persekutuar, por kam qenë aty, se kam qenë i bindur se ishte një regjim që duhej përmbysur. Kam krijuar një bindje të plotë prej shumë kohës që e vetmja mënyrë për të dalë nga kjo krizë e thellë kushtetuese, institucionale, demokracie, llogaridhënie, është përmbysja demokratike dhe vendi t’i kthehet shqiptarëve, sovranit, përmes referendumeve.
Këtu kemi një grusht njerëzish që kontrollojnë gjithçka, përfshirë dhe ekonominë, mbajnë në presion të jashtëzakonshëm edhe mediat, e gjithçka tjetër, prandaj duhet kthyer sistemi. Ky sistem, që në një far mënyre u përmbys, me ndryshimet kushtetuese të 2008, që dobësuan rolin e Presidentit, prisni sistemin e kontrollit dhe balancave, forcoi pozitën e kryeministrit, e bëri më të mbrojtur përballë Parlamentit sa i takon mocioneve. Ky sistem përmbyset me shumë këmbëngulje dhe bëhet nga të gjithë bashkë”, u shpreh Meta.
(BalkanWeb)
