Ekzekutimi i Aleksandër Sadikajt/ Autorët e mbajtën nën vëzhgim, në makinë u gjet pistoletë

Përveç se në Shqipëri, Aleksandër Sadikaj, 27-vjeçari që u vra dje në atentatin me tritol me telekomandë rezulton të jetë përfshirë në ngjarje kriminale edhe në Greqi.

Ai u vra me 400 gram tritol, nga persona ende të paidentifikuar. Sasia e tritolit ishte vënë në pjesën e përparme të mjetit nga krahu i shoferit, çka shton dyshimet e hetuesve që autorët e vendosjes së tij donin të vrisnin drejtuesin e mjetit.

Mësohet se në makinën që u hodh në erë, ekspertët gjetën edhe një armë zjarri, të llojit pistolet. Mjeti që u hodh në erë nuk ka qenë në pronësi të viktimës, por përdorej shpesh prej tij, për këtë shkak në pyetje është marrë edhe pronari i mjetit, ku po hetohet nëse mund të ketë qenë edhe ai shënjestra.

27-vjeçari ka qenë anëtar i një grupi të fuqishëm kriminal, që merret me kultivimin e lëndëve narkotike në jug të Shqipërisë, dhe trafikimin e saj drejt Greqisë. Sipas informacioneve të rezervuara nga policia e Shtetit, Sadikaj ishte personi kyç që bënte lidhjen dhe shitjen e drogës në vendin fqinj.