Manipuluesit e sjellshëm: Si të shpëtoni prej tyre?

Njerëzit mund të të manipulojnë në mënyra nga më të ndryshmet, du8ke nisur nga manipulimi përmes lajkave dhe fjalëve ledhatare e deri tek bullizimi. Nëse kjo e fundit është qartazi formë e tmerrshme dhe e dukshme manipulimi, s’mund të themi të njëjtën gjë për manipulimin që vjen në mënyrë “të sjellshme”. Ka njerëz që mund t’ja dalin t’ju manipulojnë duke e bërë në mënyrën më fine të mundshme. Ata nuk kërcënojnë në mënyrë direkte, por vënë në dyshim tiparet tuaja të karakterit, aftësitë tuaja, injorojnë kufijtë tuaj dhe këmbëngulin tek versioni i tyre i realitetit ndaj të tjerëve.

Nga ana tjetër, njerëzit që duan marrëdhënie të shëndetshme, dinë si t’i respektojnë kufijtë, përfshihen në raport, janë mbështetës dhe sillen mirë. Shpesh po të njëjtit njerëz bien pre e atyre që manipulojnë “me finesë”. Si mund t’i shpëtoni kësaj kategorie?

Njerëzit që manipulojnë duan ta injorojnë faktin që të gjithë kemi limitet dhe kufijtë tonë. Ata thjesht duan të plotësojnë nevojat e tyre dhe do të bënin gjithçka për t’ja arritur qëllimit. Zakonisht kanë tendencën të bazohen tek teoria e reciprocitetit, duke abuzuar me të. Principi i tyre është “unë ta tregova, tani është radha jote.”

Të tillë njerëz duan përgjigje të menjëhershme edhe nëse ti s’je gati për një të tillë. Për të kënaqur nevojat e tyre mund të kërkojnë fillimisht ndere të vockla, për të vazhduar më vonë me ato më të mëdha, ku gjithmonë e më shumë bëhet e vështirë për t’i thënë jo.

Manipuluesit e sjellshëm të përfshijnë kudo duke të të bërë pjesë të përgjegjësisë edhe nëse nuk je.

“Unë s’mundem ta bëj këtë pa ty. Je thelbësore në këtë projekt.” — Kjo është një prej fjalive tipike që mund të dëgjoni prej tyre, fjali të cilës njerëzit nuk i përgjigjen dot me JO.

Rregulli i parë për t’ja dalë me këtë kategori njerëziash është të qëndrojmë besnikë ndaj limiteve dhe parimeve tona.

Kur ata përpiqen të testojnë durimin, limitet apo sesa larg mund të shkojmë, qëndroni të fortë dhe besnikë ndaj vetes dhe asaj që është më e drejtë për ju.

Kujtoni që s’është puna juaj të zgjidhni problemet e tyre dhe ruani një lloj distance për të shmangur ndërveprimin e panevojshëm.

Nëse dikush ju kërkon një përgjigje të menjëhershme, ju merrni kohën tuaj. Krijojini ju afatet tuaja dhe merrni një pushim duke thënë thjesht: “Do ta mendoj”.

Në fund, për t’ju shmangur çdo keqperceptimi bëjini vetes pyetje të tipit: A po trajtohem pa respekt? A po projektohet realiteti i jetës time ndryshe pa miratimin tim? A ndihem unë mirë në këtë marrëdhënie?

Kujtoni që jeni njerëz dhe jo kukulla. Nëse ndiheni si marioneta, është koha të largoheni ose largoni njerëz nga jeta juaj.anabel