“U largova nga banesa për çështje të brendshme familjare. Pata një debat me bashkëshortin dhe prandaj u largova. Nuk e kam menduar se çështja do të bëhet kaq e madhe”. Kjo është dëshmia e kryesekretares së Gjykatës së Lezhës, Klaudia Marku, e cila për 3 ditë u zhduk pa gjurmë nga banesa e saj.
Ndonëse lajmi u bë publik vetëm dje, pas denoncimit që bashkëshorti i saj bëri në polici, pasditen e sotme u arrit gjetja e kryesekretares.
Në deklaratën që ka dhënë në ambientet e policisë së Lezhës, 34-vjeçaria ka dhënë alibinë e saj se ishte larguar pas një debati që ka patur me bashkëshortin, por nuk ka menduar se do kthehej një objekt mediatik largimi për disa orë.
34-vjeçarja deklaroi para oficerëve të policisë se ka qëndruar në një hotel në qendër të Lezhës dhe se i ishte bllokuar dhe celulari.
“Vetëm kur e kam marr vesh nga media që po më kërkojnë”, ka thënë ajo.
Marku u pikas nga policia teksa ecte e vetme në rrugët e Lezhës, pasditen e sotme, ndërkohë që ishte shpallur në kërkim policore prej disa orësh. Pasi ka parë lajmet ku burri i saj kishte denoncuar zhdukjen, ka pësuar një shok psikologjik. Deklaratën e ka marre oficerja e dhunës në familje në prani të psikologes.
Burime policore bëjnë me dije se një tjetër pistë që po hetohet, është edhe ajo e një rrëmbimi të mundshëm për disa dosje që lidhen me çështje pronësie, kjo edhe për shkak të punës që ajo bën si sekretare në Gjykatës e Lezhës. Thuhet se për këto çështje ka pasur konflikte. Aktualisht policia po vijon hetimet për zbardhjen e plotë të rrethanave të ngjarjes.
(BalkanWeb)
