LIGJET E BIZNESIT
Në kohën që një pjesë e rrugëve të vendit janë në gjendje jo të mirë për shkak të mungesës së infrastrukturës, një emigrant ka vendosur të zgjidhë vetë problemin në fshatin e tij.
Ai ka dhuruar jo pak por 300 milionë lekë për të asfaltuar rrugën e fshatit të lindjes, German në Njësinë Administrative Komsi të Matit.
Falë bujarisë së emigrantit Ilir Sadik Beshiri, banues në Kanada, do të asfaltohet segmenti rrugor Muzhakç-Gërman, me gjatësi 2.5 km. Kryetari i Bashkisë Mat, Agron Malaj, e falënderoi Beshirin për bujarinë e treguar, duke investuar në një aks rrugor të rëndësishëm për zonën.
Mësohet se punimet kanë nisur me intensitet dhe pritet të përfundojnë brenda 4 muajve. “Është një financim i bërë nga një investitor privat në bashkëpunim me Bashkinë e Matit për një rrugë prej 2.5 km që zgjidh një problematikë disavjeçare të banorëve të kësaj zone për pjesën e infrastrukturës. Aktualisht, është realizuar vetëm 50 për qind e punimeve, ndërkohë që puna po vijon për të realizuar një rrugë me standarde. Z. Beshiri ka kontribuar dhe po vijon të kontribuojë jo vetëm për zonën e tij në Mat, por në të gjithë Shqipërinë.
Gjatë pjesës së pandemisë ka bërë një investim të rëndësishëm, sikurse dhe me pjesën e tërmetit ka bërë disa investime për gjithë familjet e prekura me një shumë të konsiderueshme. Shpresojmë që praktika të tilla të kemi sa më shumë në bashkëpunim me Bashkinë e Matit, me investitorë dhe qytetarë që dua ta ndryshojnë këtë trevë ashtu siç i ka hije dhe sikurse e meriton”, tha kryetari i Bashkisë Mat, Agron Malaj.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
