Rregullat e reja për udhëtimet drejt SHBA-së, ja kush do të lejohet

Shtetet e Bashkuara të Amerikës së shpejti do të lejojnë hyrjen në vend nëpërmjet transportit ajror të shtetasve të huaj, të cilët janë plotësisht të vaksinuar, ose atyre që paraqesin një test negativ të koronavirusit të bërë brenda 24 orëve para udhëtimit, njoftoi Shtëpia e Bardhë të hënën.

Rregullat e reja hyjnë në fuqi në datën 8 nëntor dhe do të lejohen “vetëm përjashtime të kufizuara”, thanë zyrtarët e lartë të administratës së presidentit Biden.

Zëdhënësi i Departamentit të Shtetit, Ned Price u shpreh se kjo politikë “vendos shëndetin publik në radhë të parë” dhe mbron si qytetarët dhe banorët e Shteteve të Bashkuara, ashtu edhe vizitorët.

Ai shtoi  më tej duke thënë se përjashtimet nga rregulli për vaksinat janë jashtëzakonisht të pakta, kryesisht për fëmijët nën moshën 18 vjeç dhe disa individë nga vende që kanë rezerva shumë të vogla vaksinash.

Po ashtu ata që lejohen të hyjnë pa bërë vaksinën, duhet të pranojnë ta bëjnë atë në SHBA, në qoftë se kanë në plan të qëndrojnë për më shumë se 60 ditë.