Ministrja e Jashtme e Shqipërisë, Olta Xhaçka në një intervistë për Zërin e Amerikës ka folur lidhur me afganët në Shqipëri. Ajo sqaroi se faturën financiare për refugjatët në vendin tonë do ta paguajnë partnerët.
“Partnerët kanë sugjeruar përballimin e kostove nga ana e tyre. Për momentin janë duke u trajtuar me të njëjtat kosto që kanë pasur shqiptarët pas tërmetit,” tha ajo.
Fillimisht u fol për një qëndrim disa mujor të tyre në Shqipëri, por Xhaçka shtoi se do të ishte e kënaqur nëse një pjesë e afganëve do të dëshironin që të qëndronin përgjithmonë.
“Nuk janë refugjatë dosido. Janë elitë. Janë refugjatë sepse kanë qenë aleatë. Për momentin kemi 662 afganë që po strehohen, presim të vijnë dhe të tjerë. Kemi familje që janë ndarë për shkak të shpejtësisë së lëvizjes. Presim t’i bashkojmë. Mes strehimit dhe procesimit të tyre do të ketë një kohë të konsiderueshme. Bëhet fjalë për elitën e Afganistanit, janë kualifikime me të cilat do të aplikonin për programe emigracioni në çdo vend. Nëse duan që të qëndrojnë do të ishim shumë të kënaqur që ta bënim. Janë kontigjent që janë lehtësisht të integrueshëm,“-shtoi Xhaçka.
