Francezët sërish nuk “kursehen”/ Pas shuplakës së Macron, një tjetër politikan e pëson keq

Kandidati në zgjedhjet presidenciale të Francës Jean-Luc Mélenchon, ka përjetuar një moment tepër të sikletëshëm. Gjatë protestave të organizuara në Paris, një qytetar i hodhi atij miell.

Politikani po fliste para gazetarëve në lidhje me marshimin për liri që u mbajt nëpër qytetet franceze, kur një burrë iu afrua dhe i hodhi miell në fytyrë.

Policia franceze nuk ka mundur të arrestojë asnjë person në lidhje me këtë ngjarje.

Politikani Melenchon ka theksuar se incidente të tilla “duhet të marrin fund”, duke iu referuar sulmeve çdo herë e më të shpeshta mbi politikanët.

Para pak ditësh një burrë goditi me shuplakë presidentin Emmanuel Macron.

Sulmuesi, i cili u arrestua menjëherë nga policia, është dënuar me katër muaj burgim.