LIGJET E BIZNESIT
Palët politike në vend nuk kanë ndërmend ta ulin tonin e diskursit, ndonëse prej kohësh dhe vazhdimisht ndërkombëtarët bëjnë thirrje për një frymë të qetë diskutimi në prag zgjedhjesh.
Dy figura kanë mbizotëruar më së shumti debatin politik, përplasja e presidentit Meta dhe kryeministrit Edi Rama, ku secili nuk është kursyer në akuza e ofendime.
Nga Vlora, në një media lokale atje , presidenti Meta, i cili thotë se do të jetë atje dhe në 25 prill “për të mbrojtur vetë votat”, tha se: Rama është në gjendje shumë të rëndë, është i shfazuar totalisht. Ndaj tani është koha për përmbysje demokratike, për tu çliruar njëherë e përgjithmonë prej tij dhe strukturës kriminale qe ka kapur shtetin.
Jam i bindur se qytetarët vlonjatë dhe të gjithë shqiptarët janë ndërgjegjësuar se do të ndahen prej tij më 25 prill, duke dalë masivisht në votime.
Nëse ne nuk do kishim këtë Prokurori, nuk do kishim këtë situatë alarmante të drejtësisë në vend. Nëse do kishim Prokurori, Adrian Dvorani sot do ishte në burg, për vjedhjen e anëtarit të Gjykatës Kushtetuese Presidentit të Republikës.
Këtu është kapur shteti, një pakicë komanda shumicën. Prandaj në 25 prill jemi për një përmbysje dhe jo ndryshim të pushtetit.
Siç me të drejtë thotë Kim Mehmeti, për fat të keq në këtë vend ka politikanë që duhen mjekuar dhe jo votuar. Ndaj për Kryerilindasin do të ketë një dhomë të posaçme tek spitali jeshil (psiqiatrik) këtu në Vlorë, ku do ketë mundësinë jo vetëm të kurohet por edhe të shijojë aromën e detit dhe të portokalleve.
Sa i perket porosisë së tij për Damianin për të bërë “tërmet” në Vlorë, unë kam një mesazh: “Vlora ja bën fora, bjeri moj të lumtë dora” për këdo që do guxojë të prekë votat. Siç e kam thënë edhe më herët unë në Vlorë do jem për të ndjekur procesin e numërimit të votave.
