Kryeministri i bëri ftesë për bashkëpunim, Basha: Rama s’mund të sjellë ndryshimin, ai është problemi

Kryetari i Partisë Demokratike Lulzim Basha ka publikuar një video në të cilën thekson se gjatë 8 viteve qeverisje nga Edi Rama, sipas tij Shqipëria ka regjistruar papunësinë më të lartë në histori.

Basha shprehet se kryeministri aktual nuk mund të sjellë ndryshimin në Shqipëri, prandaj fton qytetarët që më 25 prill të votojnë për Partinë Demokratike.

“Per 8 vite me Ramën, Shqipëria regjistroi papunësinë më të lartë në histori. Ai nuk do të sjellë dot kurrë ndryshim. Ai është problemi. Më 25 Prill – e gjithë Shqipëria voton 9, për punësim, për ndryshim!”, shkruan Basha krahas videos.

Një ditë më parë, kryeministri Edi Rama i bëri ftesë publike Lulzim Bashës për të bashkëpunuar pas zgjedhjeve të 25 prillit, mirëpo kërkoi  ‘shkëputjen’ e tij nga Ilir Meta dhe Sali Berisha.  Basha e ka refuzuar duke thënë se Rama nuk do të bëhet kurrë pjesë e qeverisë së tij.