Celibashi bën thirrjen e fortë: Askush s’e di fituesin, çdo deklarim nuk i shërben procesit

Kreu i Komisionit Qëndror të Zgjedhjeve, Ilirjan Celibashi,mbrëmjen e sotme ka dhënë një tjetër mesazh për krerët e politikës shqiptare.

Në një postim në rrjetet sociale, Celibashi apelon subjektet politike të ndjekin me qetësi  procesin e numërimit të votave.

Kreu i KQZ-së vijon më tej duke u kërkuar lidershipëve që të tregojnë vetëpërmbajtje, në mënyrë që komisionerët dhe numëruesit të kenë klimën e duhur për të zhvilluar sa më mirë procesin.

“Ju bën thirrje subjekteve zgjedhore, që procesin në vijim ta përcjellin me qetësi pasi askush nuk e di se kush i ka fituar këto zgjedhje. Duhet të presim që të numërohen fletët e votimit, për të kuptuar se kush është fituesi i zgjedhjeve të datës #25prill2021. Çdo deklarim pa nisur procesi i numërimit të fletëve të votimit nuk do t’i shërbente qetësisë së nevojshme që duhet të shoqërojë procesin e numërimit të votave. Lidershipi politik duhet të tregojë vetëpërmbajtje në mënyrë që komisionerët dhe numëruesit të kenë klimën e duhur për të zhvilluar një proces numërimi të sigurtë dhe transparent”, thekson kreu i KQZ.