LIGJET E BIZNESIT
Gjatë një prononcimi për gazetarët sot nga bulevardi “Dëshmorët e Kombit”, presidenti Ilir Meta paralajmëroi se për pak ditë ai do të bëjë publik planin për mbrojtjen e votave të shqiptarëve për zgjedhjet e 25 prillit.
Ai përsëriti thirrjen e fortë që të mos cënohet procesi elektoral nga asnjë prej forcave politikë.
Ndër të tjera Kreu i Shtetit apeloi për fushatë zgjedhore civile dhe europiane ku të dominojnë programet dhe alternativat.
“Çdo shqiptar i ndershëm dhe partiot, është 100% dakord me presidentin që nuk duhet të vihet dorë mbi votën. Sepse prandaj jemi në këtë situatë kaq të rëndë. Jemi të parët në nivel botëror për shpopullimin e vendit. Të gjithë t’i mbajnë larg duart nga votat e qytetarëve shqiptarë, të gjithë të kontribuojnë për një fushatë civile dhe europiane, të gjithë të shpalosin alternativat e tyre se çfarë kanë bërë dhe ç’do të bëjnë në të ardhmen”, u shpreh Meta.
Presidenti iu përgjigj edhe deklaratave të Ramës pas përplasjeve te zyrat e FRD, ngjarje e të cilat kryeministri i quajti hajbutëri. Meta tha se ai nuk ka dhunuar gazetare, gra dhe vajza.
“Asnjë gazetare s’është ankuar se e kam prekur me dorë. është përpjekje për të shpërqendruar vëmendjen nga plani i vërtetë që është prekja e votave. Nuk ka sondazh të blerë dhe nuk ka plan djallëzor dhe monstruoz që të deformojë vullnetin e qytetarëve shqiptarë. Ndryshimi që ka ndodhur në Shqipëri është i jashtëzakonshme. Revolta për ndryshimet që i janë bërë Kushtetutës është e jashtëzakonshme. S’duhet të ekzistojë shqetësimi për tonin e presidentit”, theksoi kreu i shtetit.
Komentet Meta i bëri gjatë një deklarate për mediat nga sheshi “Nënë Tereza”, ku Shoqëria Civile zhvilloi një aktivitet për mbrojtjen e lumit Vjosa.
“Si president i Republikës do të jem në përkrahje të Shoqërisë Civile, të organizatave për ruajtjen e mjedisit, në mbrojtje të lumitt Vjosa dhe të gjitha degëve të këtij lumi. është pasuri kombëtare, por edhe pasuri e radhë në kontinentin tonë që duhet mbrojtur nga çdo projekt që e kërcënon atë. Duhet të ruajmë këtë pasuri për të gjitha gjeneratat që do të vijnë, është i rëndësishëm për zhvillimin e turizmit”.
