Momente paniku/ Vogëlushja bie nga kati i 12 i një pallati, pamje rrënqethëse (VIDEO)

Një shofer nga Vietnami, është konsideruar hero nga banorët, pasi shpëtoi një vajzë dy vjeçare, e cila ra nga kati i 12 i një ndërtese. Ngjarja ndodhi në momentin kur Ngueyn Ngoc Manh, ishte duke pritur brenda makinës së tij, për të kryer një dërgesë. Në ato momente dëgjoi të qarën e një fëmije.

Një grua filloi të bërtiste dhe ai, i nxitur nga kurioziteti, nxori kokën nga dritarja për të parë se ç’po ndodhte. Ai shikoi një vogëlushe që ndodhej në katin e 12, fare pranë parvazit të ballkonit.

“E pashë atë që qëndronte në ballkon”, tha ai.

Burri doli nga makina dhe u ngjit në një ndërtesë, për të qenë sa më afër në qoftë se  vogëlushja binte nga lartësia.

“U ngjita në një çati prej dy metrash për të marrë një pozicion të duhur. Fëmija ra me shpejtësi, por fatmirësisht, në pozicionin që u gjenda ajo ra pikërisht në prehrin tim”, tha Manh.

Pas ngjarjes, vogëlushja u dërgua menjëherë për në spital, ku aktualisht po merr mjekim. Gjendja e saj paraqitet e stabilizuar.