LIGJET E BIZNESIT
Libri i një 67-vjeçari që pritet të dalë në gjyq së shpejti, do të titullohet: Unë grabita Kim Kardashian.
Ngjarja spektakolare ka ndodhur vite më parë, ku i akuzuari rrëfen se si ndodhi e gjitha dhe nuk kursen as detaje nga historia e jetës së tij.
“Gjithçka shkoi mirë”, shprehet Yunice Abbas, një nga 12 të arrestuarit për vjedhjen e bizhuterive të Kim-it, teksa kjo e fundit gjendej në një rezidencë luksoze në Paris, ku do të merrte pjesë në 2016 Fashion Ëeek. Siç edhe titulli i librit e bën mëse të qartë, Abbas nuk ka në plan të kundërshtojë akuzat kundër tij në gjyq, që pritet të zhvillohet këtë vit.
Por grabitja ishte më e madhja që është kryer ndaj një individi në Francë në dy dekadat e fundit.
Bëhet fjalë për shumën marramendëse të 9 milionë eurove, ndërsa shumica e sendeve personale të Kim Kardashian nuk u gjetën kurrë.
Policia mundi të shpëtonte vetëm një kryq të mbështjellë me diamant, të cilit Abbas-it i ra gjatë çasteve të arratisë me biçikletë.
Më 3 tetor të 2016-ës, ai dhe 4 burra të tjerë, të moshës 60-72-vjeçare do të hynin në rezidencën e Kim-it rreth orës 2:30 të mesnatës. Kardashian rrëfeu se njëri prej tyre, i cili mbante veshur një xhaketë e lidhi me një kabllo plastike dhe i vendosi shirit ngjitës, përpara se ta detyronin të futej në vaskë.
Abbas tregon se e gjithë ngjarja u zhvillua shpejt dhe përfundoi pa asnjë problem.
“Mbaruam punë shpejt, ndoshta pesë, gjashtë, shtatë minuta. Kim dorëzoi bizhuteritë pa rezistencë”, tha ai.
Por ai ishte i fundit që u largua nga vendi i krimit dhe teksa doli jashtë, u ndodh ballë për ballë me një patrullë policie.
“Po mbyllja derën dhe ata më panë, kështu që dhashë një shenjë të vogël, si një përshëndetje,” tha ai. “Dukesha i qetë, të paktën u përpoqa dhe funksionoi”.
Pasi kaloi 22 muaj pas hekurave, një gjyqtar e liroi atë për arsye shëndetësore dhe Abbas tanimë shpreson që juria të tregohet bujare me të, pasi ai i është nënshtruar një operacioni në zemër.
