Qeleshja shqiptare në Kosovë! Familja trashëgon zanatin prej mëse 1 shekulli 

Prej më se një shekulli, e ndodhur në Prizren të Kosovës, familja Gjurgjialo merret me punimit të plisit ose sikurse e njohim të gjithë, qeleshes së bardhë tradicionale të shqiptarëve.

Qeleshepunuesi, Naxhi Gjurgjialo e ka trashëguar këtë zanat nga gjyshi e babai. Por ai nuk u ndal me kaq, pasi këtë zanat ia mësoi edhe bashkëshortes së tij prej 35 vitesh,  Ergylen.

Që nga ajo kohë e deri më sot, Ergyle nuk ka rreshtur së punuari plisat e të gjitha trevave shqiptare, të cilët vijojnë të jenë të pazëvendësueshme. Por me fillimin e pandemisë së Covid-19, situata ndryshoi.

‘Plisi është një kulturë kombëtare që para flamurit ka qenë. Kombi këto ka. Në pandemi, punën e mbyllëm. Nuk punuam fare. Shkuam disa hapa prapa. Vështirë. Kemi 4 punëtorë. Gjysmën e paguam. Ne jemi mësuar duke punuar”, tha qeleshepunuesja, Ergyle Gjurgjialo.

Në atelienë e tyre, nuk mungojnë as veshjet kombëtare dhe aksesorët modernë, si çanta e kapele të madhësive të ndryshme të bëra me lesh deleje, të cilin ato e sigurojnë nga Australia.

“Pas plisit kam filluar të punoj me veshjet kombëtare të grave, burrave dhe fëmijëve. Të gjitha moshave. Mirëpo çfarë është për kokë i prodhojmë. Lënda e parë është leshi i dhenve. Ne nga Kosova nuk e furnizojmë dot. Vjen prej Australisë. Nga Australia në Turqi, ku lahet pastrohet dhe zbardhohet dhe pastaj ne i blejmë nga Turqi i sjellim këtu”, tha artizania e plisit.

Qeleshet, në ditët e sotme përdoren vetëm në raste festash e  gëzimesh.