“Nuk ka ndikuar vetëm pandemia” Pastori tregon arsyen pse ka rënë numri i martesave në Shqipëri

Akil Pano është një nga pastor më të njohur në Shqipëri.

Duke folur së fundmi për martesat, ai ka deklaruar se pandemia ka ndikuar në rënien e numrit të tyre.

Por gjithashtu Pano ka renditur edhe një sërë arsyesh të tjera se përse shqiptarët hezitojnë të lidhin jetën përgjithmonë në martese më një person.

“Gjatë gjithë kohës si pastor, kam martuar më shumë se 300 çifte të ndryshme. Vitin e fundit kemi parë që ka patur një numër që shkon përkundrejt shifrave që keni publikuar. Nga kisha jonë që është realitivisht e madhe, ka patur pak çifte që janë martuar. E kjo nuk është për shkak të mungesës së dashurisë, por një pjesë e tyre e kanë shtyrë martesën që të kenë një festim më të madh. Por ka nga ata që ndihen të frikësuar”, tha Pano.

Sipas tij nuk është vetëm pandemia që ndikon. Ai shtoi se ne kemi ende “traumën e një tranzicioni të gjatë. Njeriu ndihet i papërshtatur në shoqëri”.

“Ka edhe disa arsye të tjera. Në zonat rurale të Shqipërisë shohim boshatisje të madhe. Frika për të marrë përgjegjësinë e martesës. Frika për të ndërtuar jetën në Shqipëri”, tha pastori në emisionin “Shqipëria Live”.

Gjithashtu ai shtoi se ka edhe rënie të lindjeve, e kjo prej disa kohësh jo vetëm në vitin 2020.

“Kjo lidhet me problematikat që ka jeta, kostot që ka një fëmijë. Lidhet me pandeminë në vitin 2020, por në mënyrë direkte lidhet me botën materialiste. Kemi tkurrje të lindjeve, hezitim për të bërë fëmijë, kemi plakje të popullsisë. Njoh persona që janë martuar 2-3 vitet më parë dhe kur i pyet për fëmijë, thonë: “Kemi kohë”. Por më para kur martoheshin thoshin të kishim një fëmijë sa më shpejt ta mbajmë në duar”, vijoi Pano.