Komisionerja e BE ka një mesazh të fortë për partitë politike: Merrni përgjegjësitë tuaja

Komisionerja e Bashkimit Europian për Punët e Brendshme Ylva Johansson, ndodhet këtë të shtunë në Tiranë nga ku ka zhvilluar disa takime të rëndësishme.

Ajo është takuar edhe me kryenegociatorin Zef Mazi.

Sipas Johansson, Shqipëria ka miratuar disa reforma të rëndësishme në rrugën e saj drejt Bashkimit Europian, por theksoi se ka akoma punë për tu bërë. Komisionerja u bëri thirrje partive politike që të garantojnë integritet në listat për deputetë.

“Jam e kënaqur që reformat e mëdha, reforma në drejtësi, reforma për azilin, Shqipëria ka arritur t’i miratojë. Ka shumë fusha ku bashkëpunimi ynë duhet të forcohet.

Duhet të vazhdohen reformat për shtetin e së drejtës, por dhe për të pasur një bashkëpunim më të mirë dhe situatë më të mirë.

Shqipëria po i afrohet zgjedhjeve dhe të gjitha partitë duhet të marrin përgjegjësitë e tyre që të ketë një integritet të lartë në lista. Kjo na ndihmon të bindim shtete anëtare për sundimin e ligjit në Shqipëri”, tha Komisionerja.