Kelment Balili kërkon lirimin nga qelia/ Zbulohet arsyeja e fortë, reagon gjykata

Kelment Balili, i konsideruar si një nga trafikantët më të mëdhenj të kanabisit vitet e fundit në vendin tonë, ka kërkuar lirimin nga qelia.

Balili dërgoi kërkesë në gjykatën e Elbasanit, e cila ka juridiskion burgun e Peqinit, duke shkruar se qëndrimi në qeli i rrezikon jetën si pasojë e gjendjes së rënduar shëndetësore.

Në lidhje me kërkesën e Balilit, prokuroria është shprehur kundër, ndërkohë që Gjykata e Elbasanit ka kërkuar që të kryhet ekspertiza mjeko-ligjore për të vlerësuar nëse pretendimet e Balilit qëndrojnë apo jo.

Kelment Balili u vetëdorëzua pasi ndodhej prej shumë kohësh në kërkim. Ai u dënua në muajin tetor të vitit të kaluar, ndërsa i kanë mbetur edhe 10 vite të tjera burg. GJKKO i sekuestroi Balilit 40% të pasurive, ndër to edhe kompleksin e famshëm “Santa Quaranta” i cili ndodhet në qytetin e Sarandës.