LIGJET E BIZNESIT
Superoperacioni i policisë italiane i zhvilluar së fundmi në Katanzaro, ka bërë që të arrestohen një numër i madh njerëzish, eksponentë të klaneve mafioze të Ndraghetas në Kalabri.
Mësohet se mes të arrestuarve janë dhe 7 shqiptarë, njëra prej të cilave është femër.
Ata ishin të përfshirë në korrupsion dhe mashtrim në vlerën e më shumë se 250 milionë eurove.
Sektori i preferuar i të arrestuarve ishte ai i pajisjeve mbrojtëse mjekësore, si maska, doreza apo kaska oksigjeni, ndaj këta persona kishin ngritur disa kompani fictive në pronësi të personave fals.
Këto kompani fiktive shërbenin vetë për të pastruar paratë e mafias kalabreze Ndragheta, ndërsa në krye të grupit qëndronte sipërmarrësi Antonio Gallo, i njohur me nofkën “princi”.
Antonio Gallo është bashkëpronar i kompanisë “Gallo Albania” me Kledia Baçin dhe Henrik Baçin, ky i fundit një prej të dyshuarve për lidhje me mafian, i cili u la në “arrest shtëpie” nga gjykata italiane.
Kompania “Gallo Albania” u krijua në 4 maj të vitit 2017, ndërkohë që në QKB rezulton se kompania merret me një numër të madh aktivitetesh, duke filluar nga import-eksporti i veshjeve tekstile, printime logosh e deri te krijimi dhe menaxhimi i programeve komjuterike.
Henrik Baçi është biznesmeni që në muajin prill të vitit 2020 i dhuroi spitaleve shqiptare 3000 maska mbrojtëse dhe 50 veshje kirurgjikale për të luftuar pandeminë.
