Ulja e rasteve të reja/ Mjeku i njohur tregon çfarë po ndodh në disa zona të Tiranës

Pas rënies së rasteve pozitive me C OVID19 ditët e fundit, mjeku Ilir Alimehmeti është shprehur se në disa zona të Tiranës, imuniteti i tufës është në arritje e sipër.

“Duket se në disa grupmosha të caktuara dhe në disa zona të caktuara, imuniteti i tufës është në arritje e sipër. Përgjithësisht, janë mosha të reja dhe disa zona të caktuara në Tiranë. Automatikisht, kjo sjell edhe ulje të rasteve të reja. Megjithatë, nuk e dimë nëse kjo është e vërtetë, pasi nuk ka një studim në Shqipëri, por duhet bërë patjetër. E dyta, shohim rënie drastike të pozitivitetit të testimeve”, tha Alimehmeti në A2.

Gjithashtu mjeku foli dhe për variantin e ri të k oronavirusit i cili është shfaqur në Britaninë e Madhe.

Sipas tij, duke qenë se nuk ka persona që të jenë riinfektuar, tregon se varianti i ri nuk ka shumë ndryshim nga C OVID19 aktual.

“Skuadrat angleze janë goxha të forta në këtë hetim që po bëjnë. Megjithatë, ne i bazohemi vëzhgimeve. Fakti është se ka nisur atje në shtator dhe tashmë jemi në dhjetor dhe kjo është shqetësuese. Nuk ka pasur klinikë më të keqe, nuk pati vdekshmëri më të madhe. Pas njoftimit u mbyllën shtetet, por me vonesë. Komunikimi është pikë shumë kyçe.

Varianti nuk bën ndonjë çudi. Aktualisht, po studiohet nëse vaksina do të jetë efektive ndaj këtij varianti. Deri në këtë moment, nuk kemi riinfektime me variantin e ri të personave që e kanë kaluar koronavirusin dhe kjo tregon se nuk kanë shumë ndryshim”, tha mjeku Ilir Alimehmeti.