“Bënte gjeste banale” Deputeti Jenisheri flet për sherrin që bëri me gruan në spital: Nuk ka polici që më arreston mua

Deputeti Selami Jenisheri është një nga figurat politike më të komentuara në kuvendin shqiptar.

Shpeshherë ai ka fituar dhe vëmendje për situatat që krijon jashtë ambienteve të atij institucioni.

Konkretisht, një ditë më parë ai u bë viral në rrjetet sociale për shkak të incidentit të tij me një zonjë.

Deputeti kërkonte të shmangte radhë duke e justifikuar me statusin e tij të deputetit. Zonja nuk e pranoi një argumentim të tillë dhe iu përgjigj se nuk ka asnjë të drejtë të shmangë radhën. “Jo deputet, por dhe president të jeni nuk mund të futeni i pari”

Ndërkohë ditën e sotme Jenisheri ishte i ftuar në emisionin “Shqipëria Live”, për të treguar versionin e tij të ngjarjes. Deputeti tregoi se në asnjë moment nuk ka përdorur statusin e tij për të shmangur radhën, por ka pritur si gjithë të tjerët.

“Unë shkova për të pyetur se kush është mjeku im i familjes. Pyeta se kush është i fundit në radhë dhe ishte zonja. I thashë mirë, unë do jem pas teje. Dhe dola të prisja jashtë. Aty më njohën disa njerëz që më kishin parë në televizion dhe kishin pëlqyer fjalimet e mia. Dikush aty tha ‘ky është deputet, le të hy para se vetëm ka për të pyetur’. Në ato momente nis ajo zonja e flet në atë mënyrë”, tha Jenishehri.

Ky i fundit shtoi se zonja shante, bënte gjeste banale dhe madje e kërcënonte se do e arrestonte policia.

“Kam përmendur policinë vetëm se tha ajo do të të arrestojnë se sipas saj nuk po respektoja radhën. Unë thashë se nuk mund të më arrestojnë se nuk e prisha radhën, por edhe nëse do më arrestonin, duhet që të bëhet votimi në Kuvend”, tregoi deputeti.

Jenishehri shtoi se në asnjë moment nuk ka tentuar që të futej pa radhë. “Unë kam hyrë pas zonjës, e cila ishte jo normale dhe bënte gjeste jo të bukura”, përfundoi deputeti.