“Isha në vendin e gabuar” Ekzekutimi i ‘të fortit’ të Shkodrës, i arrestuari habit me dëshminë e tij në gjykatë

Ditën e sotme Gjykata e Shkallës së Parë në Shkodër ka caktuar masën e sigurisë “arrest me burg” për Milkjor Gjokën, të dyshuar si bashkëpunëtor në vrasjen e Ridvan Hysenit në fshatin Mushan të njësisë administrative Dajç në Shkodër.

Ndërsa gjykata ka dhënë masën lehtësuese “detyrim paraqitje” për dy dëshmitarët Blerim Mlloja dhe Marjeta Gramshi, pronarët e karburantit, para së cilit ndodhi ngjarja, të arrestuar për “moskallëzim krimi” si dëshmitarë në vrasjen e 46-vjeçarit.

Prokuroria ka kërkuar masën “detyrim paraqitje” për dy dëshmitt ndërsa për Milkjor Gjokën, organi i akuzës kërkoi arrest me burg, masë e cila ku konfirmua nga gjykata.

Gjoka ka pretenduar se nuk ka asnjë lidhje me vrasjen e ndodhur duke mohuar akuzat.

Ai tha se ka qenë rastësisht në vendin e ngjarjes, “në vendin e gabuar dhe në momentin e gabuar”, duke mohuar se ka bashkëpunuar me vëllezërit Mehmedaj që dyshohen si autorë të vrasjes së Ridvan Hysenit ose i njohur edhe si Ridvan Ramazani.

Ndërkohë Milkjor Gjoka nuk ka dhënë sqarime të mëtejshme rreth ngjarjes. Pala mbrojtëse kërkoi një masë me lehtësuese, por gjykata vendosi “arrest me burg”.