“Nuk jam i kënaqur as me veten time” Rama i nevrikosur pas mbledhjes së PS: Lëre pastaj me drejtuesit politikë

Pas takimit të zhvilluar mëngjesin e sotëm në Partinë Socialiste së bashku me drejtuesit politikë të qarqeve, kryeministri Edi Rama ka dhënë një deklaratë për gazetarët.

Mbledhja ka zgjatur rreth një orë, ndërsa kreu i qeverisë u shpreh se tani është koha e duhur për të intensifikuar komunikimin me njerëzit, përpara zgjedhjeve elektorale të 25 prillit 2021.

“Është koha për të intensifikuar komunikimin me njerëzit dhe punën që të vazhdojmë të përmirësojmë marrëdhëniet e pushtetit qendror dhe vendor me bazën”, u shpreh Rama.

Gjithashtu kryeministri i është përgjigjur interesit të mediave dhe për draftin e propozuar nga opozita e bashkuar në lidhje me ndryshimet në Kodin Zgjedhur, por nuk preferoi të japë komente.

“Është në tagrin e grupit që merret me këtë çështje që të trajtojë, nuk jam në dijeni”, tha Rama.

I pyetur nëse është i kënaqur me punën e drejtuesve të PS në qarqe, kreu i qeverisë tha se nuk është i kënaqur as me veten e tij.

“Unë nuk jam asnjëherë i kënaqur as me veten time lërë më me drejtuesit politikë”, deklaroi kryeministri ndër të tjera.