Vazhdon radha kilometrike në Kakavijë, ushtria nis shpërndarjen e ushqimeve

Forcat e Armatosura kanë nisur të shpërndajnë ushqime në pikën doganore të Kakavijës. Qytetarët janë të bllokuar që prej 3 ditësh në radhë të gjata.

Autokolona e makinave mbetet e gjatë, thuajse deri pranë fshatit Jergucat. Gazetari Erion Skëndaj ka intervistuar disa prej qytetarëve, mes të cilëve ka edhe nga ata me probleme shëndetësore, të moshuar, por edhe shtetas të huaj.

Ndërkohë, gjatë ditës sotme, grupe të rinjsh kanë shpërndarë shishe me ujë. Situata e rëndë pritet të vijojë edhe nesër, pasi pala greke pritet të mbyllë doganën, duke detyruar qytetarët të flenë në makina.