LIGJET E BIZNESIT
Kryeministri Edi Rama ka dalë në një konferencë të përbashkët me ministren e Financave Anila Denaj dhe atë të Rindërtimit Arben Ahmetaj.
Gjatë fjalës së ti, kryeministri ka folur për marrjen e Eurobondit nga Shqipëria, ku ka thënë se qeveria po bën gati planin “Shqipëria 2030” që do të publikohet së shpejti për tu aksesuar nga të gjithë.
Rama tha se rezultati i Shqipërisë është spektakolar dhe se vendi ka arritur të marrë 4 herë më shumë para nga sa i nevojitej, dhe se është trajtuar me një normë interesi tejet të favorshme prej 3.65%.
Kreu i qeverisë nuk harroi të sulmonte dhe opozitën duke thënë se ishte i zhgënjyer nga reagimi i tyre dhe vëmendja që mediat i kishin dhënë këtij lajmi.
Ai ka thënë se PD flet si balonë tabake pa bisht, dhe nuk ka lidhje me realitetin.
Rama shtoi se vërtetë është marrë borxhi, por shteti shqiptar ka arritur të fitojë besueshmërinë në tregje.
“Kemi dalë me prim zero. Më vjen keq që flitet në mënyrë të ngjashme me fluturimin e balonave tabake pa bisht, nuk e di, kur ishim fëmijë kishim pasion balonat. Balonat tabake ishin më të bukura dhe më bindëse balonat tauke. Balonat tabake kishin skelet simetrik, por kur s’kishin bisht, nuk fluturonin dot. PD tamam në formën e një balone tabake, flet për një gëzim pse morëm borxh. Ndërkohë që duhet të hidhëroheshim. Krejt e kundërta është e vërtetë. Ne kemi marrë një konfirmim nga tregjet, që në radhë të parë na bën një vend të besueshëm, në radhë të dytë na jep mundësinë të zgjerojmë bazën tonë të financimit të ekonomisë dhe të investimit, ndaj thashë është një bazë që konsolidon planin tonë të ri kombëtar, Shqipëria 2030. Do të kujtoj vetëm një detaj, që ministrat mund t’a shtjellojnë më mirë. Kur vendi del në tregun e kapitaleve, kur qeverisnin ata që flasin sot, ka ndodhur që gjatë procesit të daljes në treg, hyri për 7 dhe doli me 11. Atyre që thonë “Hë mo se borxh morët”, ju kujtoj se nuk mjafton të duash të marrësh borxh, dhe se ata që japin borxhe duhet besim, dhe besimi varet mbi librat e llogarive.”, deklaroi kryeministri.
