Një studim i kryer nga Britania e Madhe zbuloi se steroidi me emrin Dexamethasone mund të ulë rrezikun e vdekjes së pacientëve me koronavirus. nga ky moment është rritur kërkesa e këtij medikamenti.
“Kërkesa ka nisur që të rritet pas studimit që tregoi benefitet e dexamethasone,” u shpreh drejtuesi i përgjithshëm i OBSH, Tedros Adhanom Ghebreyesus nga Gjeneva ditën e sotme.
OBSH deklaroi se i mirëpret rezultatet e testeve klinike kur rezultatet e studimit paraprak u njoftuan javën e kaluar. Zbulimet ende nuk janë botuar pasi vazhdon përpilimi i tyre.
“Megjithëse të dhënat janë ende paraprake, konstatimi i fundit se steroidi deksametazon ofron mundësi të shpëtimit të jetës për pacientët me sëmundje të rëndë Covid-19 na dha një arsye shumë të nevojshme për të festuar,” tha Tedros.
“Sfida e radhës është që të rrisim prodhimin që të mund ta shpërndajmë në mënyrë të shpejtë dhe në mënyrë të barabartë, duke u fokusuar aty ku nevojitet më shumë,” shtoi kreu i OBSH.
“Për fat të mirë ky është një medikament jo i shtrenjtë dhe gjenden shumë prodhues të tij në të gjithë botën, për të cilët ne kemi besim se mund ta përshpejtojnë prodhimin.”
Tedros u shpreh se ndërsa medikamenti tregon benefite tek të sëmurit rëndë me Covid-19, te ata me simptoma të lehta nuk është parë asnjë ndikim.
