Akuzohet nga Gjykata e Hagës, Thaçi anulon fluturimin në Uashington

Presidenti i Kosovës Hashim Thaçi ka anuluar fluturimin drejt Uashingtonit, ku do të merrte pjesë në dialogun Kosovë-Serbi.

Ky vendim erdhi pas akuzave të ngritura nga Gjykata e Hagës për krime lufte.

Lajmin e bën me dije i dërguari special i Donald Trump për dialogun Kosovë-Serbi, i cili thotë se është njoftuar nga Thaçi për anulimin e vizitës.

Akuzat ndaj presidentit dhe kreut të PDK-së, Kadri Veseli erdhën një ditë para takimit në Uashington.

Tashmë dialogu Kosovë-Serbi do të mbahet me prezencën e presidentit serb, Aleksandër Vuçiç dhe kryeministrit të Kosovës, Avdullah Hoti.

“Presidenti i Kosovës sapo na ka informuar se ka anuluar udhëtimin e tij në Uashington, D.C pas njoftimit të bërë nga Zyra e Prokurorëve Specialë.

Unë e respektoj vendimin e tij për të mos marrë pjesë në diskutime derisa çështjet ligjore të atyre pretendimeve të zgjidhen,” thotë Richard Grenell.