Disa minuta pas përfundimit, ambasada amerikane në Tiranë ka zbardhur detaje rreth takimit që u zhvillua mes ambasadores Yuri Kim dhe kryeministrit Edi Rama, në zyrën e këtij të fundit.
Me anë të një njoftimi në rrjetet sociale, instuticioni diplomatik zbulon se ata kanë biseduar mbi ngjarjet e fundit dhe u pajtuan se është thelbësore që Shqipëria të vijojë në rrugën e saj drejt arritjes së dakortësisë për reformën zgjedhore.
Ambasada e SHBA-së ka paralajmëruar se Yuri Kim do të takohet edhe me kreun e PD-së Basha së shpejti.
‘Ambasadorja e SHBA Yuri Kim u takua sot me Kryeministrin Rama për të diskutuar mbi ngjarjet e fundit. Ambasadorja theksoi rëndësinë që ka gjithëpërfshirja dhe diskutimet e mirëmenduara në qeverisje, në përputhje me statusin e Shqipërisë si anëtare e NATO-s dhe vend që synon anëtarësimin në BE. Ata u pajtuan se është thelbësore që Shqipëria të vijojë në rrugën e saj drejt arritjes së dakortësisë për reformën zgjedhore dhe masave të tjera që u janë premtuar qytetarëve të Shqipërisë. Ambasadorja Kim do të takohet edhe me kreun e PD-së Basha së shpejti’, thuhet në njoftim.
