LIGJET E BIZNESIT
Në rradhët e personave që nuk qëndrojnë dot në karantinë këto ditë, padyshim ka dhe nga ata që duhet të sigurojnë të ardhurat e përditshme për mbijetesën e tyre dhe të familjes.
Rasti më i fundit është një qytetar nga Bulqiza, i cili mbledh kanoce dhe nuk e respekton dot karantinën pasi nuk ka mundësi financiare për të qëndruar në shtëpi.
Videon e ka postuar ish-deputetja e Partisë Demokratike Dhurata Cupi, e cila shprehet se alternative e Ramës për më të varfrit është uria ose rreziku nga infektimi.
Ajo bën thirrje që qeveria të hartojë urgjent një paketë ndihme ekonomike dhe sociale për qytetarët nga qeveria ashtu si dhe Partia Demokratike sipas saj e ka propozuar më parë.
“Sabiti jeton në Bulqizë duke mbledhur kanaçe tek mbetjet ushqimore në Qafë Buall. Ai e ka të pamundur, në kuptimin e plotë të fjalës, të qendrojë në karantinë, sepse i duhet të zgjedhë mes mundësisë për të mos u infektuar dhe urisë së sigurtë të fëmijëve.
Dita kur ai nuk do të dalë të mbledhë kanaçe për të fituar 3 mijë lekë të vjetra në ditë, do të jetë dita e urisë për familjen.
Fatkeqësisht, familjet si ajo e Sabitit, janë me mijëra në Shqipëri. Ndryshe nga sa predikon kryeministri, ata as nuk bëjnë dot joga, as nuk kanë luksin të ushqehen dot 2 herë në ditë.
Duke mos marrë asnjë masë që i ndihmon ata, qeveria i ka lënë më të varfrit të përballen vetëm me 2 alternativa: me koronavirusin ose me urinë”, shkruan ish-deputetja.
