Koronavirusi vjen në Shqipëri/ Konfirmohen 2 rastet e para, babë e bir shtrohen në QSUT

Mësohet se ata janë babë e bir, të moshës 54 dhe 28 vjeç, të cilët kanë ardhur nga Firence në Tiranë.

Të prekurit kanë mbërritur me makinën e tyre nëpërmjet pikës kufitare të Hanit të Hotit.

Ende nuk dihet data se kur kanë mbërritur në Shqipëri apo itinerari që kanë ndjekur.

Lajmin e ka bërë me dije Ministria e Shëndetësisë duke konfirmuar kështu se të dy personat e prekur ndodhen në spitalin infektiv në QSUT dhe gjendja e tyre është e stabilizuar.

“Strukturat tona të urgjencës kombëtare dhe ISHP janë duke ndjekur protokollin klinik dhe epidemiologjik për të dy rastet.

MSHMS përsërit thirrjen për qytetarët që kanë udhëtuar nga vende të prekura dhe ndjejnë simptoma të ngjashme me gripin, të telefonojnë në nr.127, ku mjekët tanë do t’i përgjigjen çdo rasti.

MSHMS u bën thirrje qytetarëve të ruajnë qetësinë dhe të zbatojnë rigorozisht rregullat e higjenës, sipas njoftimeve që kemi bërë gjatë gjithë kësaj kohe.
Gjithashtu u bëjmë thirrje qytetarëve që t’u referohen vetëm burimeve zyrtare për marrjen e informacionit. MSHMS do të vazhdojë të ofrojë informacione të përditshme mbi situatën dhe masat e marra”, njofton Ministria e Shëndetësisë.