Operacioni Forca e Ligjit ka vijuar punën edhe sot, në kuadër të goditjes së krimit të organizuar dhe pasurive të vëna në mënyrë të paligjshme.
Nën “shënjestër” këtë herë është vënë Ervis Martinaj, emër ky i lakuar për vrasjen në ish-Bllok më 4 tetor të 2018, ku humbi jetën Fabiol Gaxha.
Por OFL nuk është ndalur me kaq, ku të njëjtën kërkesë për deklarim pasurie ka bërë edhe për dy vëllezërit me banim në Tiranë V. Kaçorri dhe A. Kaçorri, të dënuar për vrasje.
NJOFTIMI ZYRTAR I POLICISE
Vijon operacioni Forca e Ligjit, në bashkëpunim me strukturat vendore të Policisë, në zbatim të detyrave të përcaktuara në Aktin Normativ të datës 31 janar 2020, për dërgimin e kërkesave për vetëdeklarim të pasurisë, personave që janë subjekt i këtij ligji.
Në këtë kuadër, OFL u ka dërguar kërkesat për vetëdeklarim të pasurisë, shtetasve:
– E. M., me banim në Kurbin, person në hetim për veprën penale “Vrasja me paramendim”;
– A. K., me banim në Tiranë, i dënuar në Itali për vrasje;
– V. K., me banim në Tiranë, i dënuar në Itali për vrasje dhe trafik armësh;
Brenda 48 orësh, këta individë, si subjekt i Ligjit Special, duhet t’u përgjigjen me shkrim të gjitha pyetjeve të OFL-së.
Më pas, përgjigjet e marra do t’i dërgohen SPAK-ut, për veprime të mëtejshme. Me qëllim evidentimin dhe dërgimin në SPAK, të të gjithë personave që janë subjekt i Ligjit Special, OFL është në veprim të pandërprerë dhe në kryerje të veprimeve komplekse. Për të gjitha nismat procedurale dhe operacionet ekzekutive që do të kryejë, OFL do të informojë publikun në vijimësi.
