I ashpër është treguar sot gjatë fjalës së tij në Kuvend deputeti i opozitës së re Lefter Maliqi.
Ai ka replikuar me ministrin e Brendshëm Sandër Lleshaj në lidhje me situatën e rendit dhe sigurisë publike në vend, duke hedhur akuza dhe kritika të forta për qeverinë.
“Kush i favorizoi këta bossët e krimit që do t’i godisni ju? A po e kuptoni që po shthurni rininë shqiptare? Po shesin trupin nënat tona, femrat. Ku e ke policinë kriminale? E ke mbushur PK me zjarrfikësa dhe sekretarë.
Krime të pazbuluara, e dini ju ç’po ndodh nëpër fshatra, që iu vidhet bagëtia. Mos më trego mua shifra si në kohën e koperativës. I janë rritur rrogat që në kohën e PD-së policave. E keni katandisur këtë vend që ç’tu them… si mund të përdorësh gaz tek nënat dhe fëmijët. Ca mashtruesish ordinerë jeni bërë. Po ti s’ke faj, se fajin e ka njëri që u bë kryetar e tani Ali Pasha me mjekrën njëpëllëmbë.
Kryemininistri del tek 100-vjetori e bën batuta. Ai Soreca thotë që “po ndjekim paranë”. Po po ndiq paranë. Ju jeni bërë si zjarrfikësja, ju shkoni në vendin e ngjarjes kur është djegur çdo gjë. Unë s’jam i fortë, nuk hahem me shtetin. Kush hahet me shtetin? Edhe SPAK-un e mbytën, s’do të vejë njeri tek SPAK. Të gjithë kalojnë tek OFL, se s’do të vejë njeri në SPAK.”, u shpreh Maliqi gjatë fjalës së tij.
