Specialistja e Institutit të Shëndetit Publik Eugena Tomini, ka dalë sot në një konferencë për mediat.
Ajo ka sqaruar disa gjëra në lidhje me situatën që po kalon vendi ynë për shkak të frikës së përhapjes së koronavirusit, ku ndër të tjera ka treguar se kur dhe kur nuk duhet të përdorën maskat.
Tomini shpjegoi se nëse nuk jeni të infektuar me virusin, nuk këshillohet përdorimi i tyre.
“Theksojmë me shumë rëndësi vetëm në ato raste kur dyshohet se jeni të sëmurë, jeni të vetëkarantinuar apo keni kontakte me persona të sëmurë. Nuk rekomandohet përdorimi i maskës në ato raste kur nuk jeni të sëmur apo nuk keni paraprakisht rekomandimin mjekësor. Qytetarët të shtojnë masat; larje të duarve, përdorim i letrës sa herë tështimë, të minimizojmë prekjen me dorë të hundës dhe syze, etj”, – u shpreh Eugena Tomini.
Gjithashtu ajo tregoi ndër të tjera, se meqë virusi lindi dhe u përhap në sezonin e dimrit, si të gjitha virozat e tjera gripale, kur të rriten temperaturat atëhere do të bjerë dhe veprimi.
Më tej ajo ka sqaruar se kur një pacient duhet të bëjë analizën për të parë nëse është prekur nga koronavirusi apo jo.
“Është një infeksion respirator. U shfaq gjatë sezonit të dimrit. Survejanca është e forcuar dhe shpresojmë që në vazhdimësi kjo sëmundje do të ketë ulje. Realisht ka disa kritere për të vendosur nëse ky pacientë duhet testuar apo jo. Ky vlerësim klinik bëhet aktualisht nga Qendra e Sëmundjeve Infektive në QSUT. Triazhimi klinik bëhet nga mjekët për të gjithë rastet që kanë shenja klinike. Diagnoza laboratorike bëhet nga ISHP. Rezultati del brenda 8 deri në 12 orëve.
Aktualisht që flasim nuk kemi raste të dyshuara për 8 rastet e djeshme të testuara. Janë vlerësuar në nivel kombëtar 4300 raste vetëm në nivelin e aeroportit. Pjesa tjetër e rasteve të vlerësuara janë vlerësuar në pikat kufitare detare e tokësore. U kemi sugjeruar gjithë udhëtarëve që vijnë nga zonan e Lombardisë për vetëkarantinim”, – theksoi Eugena Tomini.
