Zëdhënësja e Autoritetit Portual të Durrësit, Elitjana Doko, ka folur sot për masat që janë marrë për koronavirusin. E ftuar në emisionin, “Real Story” në News 24, Doko tha se porti dhe institucionet e tjera kanë marrë masa për ndalimin e virusit.
Sipas saj masat janë marrë që kur OBSH ka dhënë informacionin, për përhapjen e virusit dhe është shtuar siguria në port. Më tej zëdhënësja theksoi se deri tani nuk ka asnjë rast të dyshuar për pacientë të sëmurë me koronavirus.
“Ministria e Shëndetësisë ka ngritur tashmë Task Forcën. Ishin tre kinezë që kanë hyrë në Shqipëri, të cilët para vendit tonë kishin qenë në shtete europiane, por ne morëm masa. Atyre iu është bërë kontrolli, iu mat temperatura dhe jemi në gatishmëri të plotë si port. Media duhet të japë informacion më të saktë. Situata po shikohet 24 orë në 24, nga të gjitha instancat tona. Nuk ka pasur asnjë rast të dyshuar gjatë gjithë kësaj kohe. Ne si port zbatojmë të gjitha masat e Ministrisë së Shëndetësisë”, ishte kjo deklarata e Dokos.
