Në ceremoninë e 107 vjetorit të themelimit të Policisë së Shtetit, duke folur për finalizimin e projektit të repartit bashkëkohor për forcat speciale RENEA, kryeministri Edi Rama ka bërë një paralajmërim të fortë duke rikujtuar organizatën kriminale të rrezikshme në vend, që ai e quan “KÇK”.
Rama është shprehur se sistemi i drejtësisë do të pastrohet shumë shpejt dhe se po bëhet një ligj për të cilin po konsultohet aktualisht me ndërkombëtaret, ku është shprehur se ka ardhur koha që të provohet se pasuria e tyre nuk buron nga krimi dhe se do të vihet me ‘shpatulla pas murit’ çdo anëtar i drejtësisë që do marrë vendime në kundërshtim me ligjin.
Ai shtoi se ka gjykatës dhe prokurorë që nuk do i shpëtojnë dot sistemit të drejtësisë, pasi po japin vendime në kundërshtim me ligjin dhe që cënojnë sigurinë kombëtare.
“Po bëhet një pastrim në sistemin e drejtësisë. Jemi në fazë tranzicioni mes 1 sistemi që shembet dhe 1 që ngrihet. Shoqëria jonë po përballet me 1 organizat kriminale brenda sistemit të dretësisë. Një organizatë e rrezikshme e përbërë nga prokurore e gjykatës që e kanë të qartë se nuk i shpëtojnë drejtësisë.
Ata janë duke dhënë vendime në cënim të sigurisë kombëtare dhe në cënim me ligjin. Prandaj kemi ndërmarrë nismën e një pakete ligjore që jemi duke konsoliduar këto ditë që flasim dhe partnerë ndërkombëtare dhe në ditët në vijim do ta kthejmë në një bazë ligjore.
Ka ardhur kohë të provojmë se pasuria e tyre nuk buron nga krimi ose përndryshe të dorëzojmë pasurinë e tyre, dhe paralelisht me ta ne do të vëmë me shpatulla pas murit çdo anëtar të drejtësisë që do marrë vendime në kundërshtim me ligjin”, u shpreh Rama gjatë fjalës së tij.
