Deputetja e Opozitës së Re Rudina Hajdari ka përcjellë një video-mesazh së fundmi. ku uron të gjithë shqiptarët për Vitin e Ri 2020.
Hajdari kujton tërmetin e fuqishëm që goditi vendin tonë mëngjesin e 26 nëntorit, ku u shkaktuan 51 viktima dhe shpreson që të gjithë familjarët të gjejnë forcën për të rinisur jetën.
Ajo shprehet se ky prag festash e ka gjetur Shqipërinë dhe shqiptarët të tronditur dhe zemërthyer.
Në fund Hajdari ka falenderuar shtetet dhe të gjithë shqiptarët në botë që u janë gjetur pranë qytetarëve në këtë situatë ku ata kishin më shumë nevojë.
URIMI I PLOTE I RUDINA HAJDARIT
Në këtë periudhë festash dua të shpreh urimet e mia të përzemërta për të gjithë shqiptarët kudo që ndodhen, familjarët, fëmijët dhe miqtë e tyre. Lumturia, shëndeti i plotë dhe mirësia le të mbizotërojnë në zemrat tuaja. Shpresa dhe optimizmi për ndryshim dhe sukses drejt realizimit të ëndërrave qoftë udhërrëfyesi i jetës tuaj.
Ky prag festash e gjetën Shqipërinë dhe shqipëtarët të tronditur dhe zemër thyer. Fatkeqësia që shkaktoi tërmeti i 26 Nëntorit do mbahet mend gjatë në memorien e të gjithë qytetarëve për pasojat e rënda dhe dhimbjen e madhe që solli duke shkaktuar 51 viktima e duke lënë të pastrehë mijra të tjerë. Por, edhe për solidaritetin dhe bashkimin e të gjithë bashkëatdhetarëve tanë dhe miqve në mbar botën, duke ju qëndruar pranë dhe duke kontribuar në lehtësimin e përballimit të pasojave të këtyre ditëve të errëta.
Një përqafim dhe mesazh i përzemërt shkon për të gjithë qytetarët e prekur nga kjo fatkeqësi, personat që humbën të afërmit e tyre, prindërit e tyre, vëllezërit dhe motrat, fëmijët, nipërit e mbesat ,miqtë e zemrës. Dhimbja që ka goditur në zemrat tuaja ka lënë plagë të përjetshme. Uroj për të gjithë ju që të gjeni forcën e duhur për të rinisur sërish jetën dhe bekimin e madh që këto tragjedi apo asnjë e keqe të mos prekë më në familjet tuaja.
Gjej rastin të falenderoj dhe të uroj që këto festa të sjellin gëzim dhe lumturi për të gjithë shqiptarët mbar botën, Kosovën dhe çdo shtet apo individ që me zemërgjerësinë dhe dashamirësinë e tyre u gjendën pranë qytetarëve shqiptarë në një situatë ku ajo kishte më së shumti nevojë.
Gëzuar për të gjitha familjet shqiptare, fëmijët, jetimët, të sëmurët, emigrantët ,miqtë , shoqërinë.
Viti 2020 qoftë për Shqipërinë vit i mbushur me dashuri, lumturi, solidaritet ku të mbizotëojë demokracia, shteti i së drejtës, liria, barazia para ligjit, vlerat dhe dinjiteti i njeriut.
